Amit Shah-a'n Rajasthan-ah CAA thlawpna campaign a hawng

Rampuma kalpui tur Citizenship Amendment Act (CAA) 2019 thlawpna campaign chu nimin khan Rajasthan-a Jodhpur-ah union home minister leh BJP president ni bawk, Amit Shah chuan a hawng.

CAA bakah hian rampuma National Register of Citizens (NRC) leh National Population Register (NPR)-te kalpui a nih theih nan campaign a nei nghal bawk. He hunah hian Amit Shah chuan CAA thlawptute tan an thlawpna tihlan nan, 'toll-free number' an tarlannaa miss call mai tur a nih thu a sawi lang.

Jodhpur-ah hian dan loa lut mi 25,000 dawn an awm thu tarlan a ni a, CAA hman a nih dawn takah hian henghote harsatna tawh ṭhin chu sut kian thuai a nih rin a ni. Rajasthan chief minister Ashok Gehlot hi congress CM zinga CAA duh lohna lantir hmasa ber a ni a, nikum December 22 khan rally buatsaihin, CAA leh NRC chu an state-a hman a nih ve dawn loh thu a sawi. 

Nimin vek khan Goa-ah chuan BJP working president JP Nadda hoin CAA thlawpna rally buatsaih a ni a, CAA chu NRC leh NPR nena hriat pawlh loh tur a nih thu JP Nadda chuan a sawi. West Bengal, Jharkhand, Odisha, Uttar Pradesh, Bihar leh Hmarchhakahte pawh CAA thlawpna campaign neih tum a ni a, rampum huapin BJP chuan he campaign hi neih an tum bawk. State tinah in-charge dah vek a nih thu BJP chuan an tarlang.

CAA thlawpna campaign hi January 5 aṭanga ni 15 thleng neih tum a ni a, Rashtriya Swayamsevak Sangh (RSS) chuan he campaign hi nasa takin an thlawp dawn tih an sawi tawh bawk. Amit Shah leh JP Nadda telin, rampumah he campaign kalpui a nih theihna tur hian hruaitu 50 dah an ni tawh.