May 31 thleng lockdown pawtsei

Hri leng darh zel tur venna atana ram puma lockdown kalpui mek chu sorkar laipui chuan May 31 thleng atan a pawhsei leh. 

Prime minister Narendra Modi chuan May 11-a thu a sawinaah, lockdown hi pawhsei a ni dawn a, mahse kalphung thar hman a ni dawn tih a lo sawi tawh a ni. State leh union territory-te chu khar­khipna kalpui dan tura rawtna an neihte thehlut turin hriattir an ni.

Hripui leng vanga khar­khipna hi India ramah a thawh khatna atan March 25 aṭang khan ni 21 chhung kalpui a ni a, hemi hnu hian April 15 leh May 4 ah pawhsei an ni leh a, nimin khan a thawh lina turin pawhsei a ni leh ta a ni. 

Vawiin aṭanga lockdown 4:0 kalpuina turah hian khuahkhirhna tam zawk  thlahdul a ni tawh dawn thung.

 Security thila MHA in phalna a pek tih lohah chuan domestic leh internation air service phal a la ni lo. 

 Metro rail service khap a la ni. 

 School, college, educational/training/coaching institution-te khar an la ni ang. Online/distance learning hman chhunzawm hrih tur. 

 Hotel, restaurant leh hospitality service dang, tangkhangte awmna leh quarantine facility atana hman tih loh chu hawn phal a la ni lo. Restaurant-te chu home delivery tih phalsak an ni a, hemi atan hian choka bik chu hman phal a ni. 

 Cinema hall, shopping mall, gymnasium, swimming pool, entertainment park, theatre, bar, auditorium, assembly ball leh hetiang hmunte chu hawn phal a la ni lo. Sports complex leh stadium te hawn phal a ni a, mahse entu awm phal a ni lo thung. 

 Punkhawmna lam chi - social, political, sports, entertainment, academic, cultural leh sakhaw lam hawia buatsaih khap a la ni.

Cabinet secretary Rajiv Gauba chuan nizan dar 9 khan state leh UT chief secretary/DG te chu video conference hmanga meeting neihpuiin, lockdawn 4.0 kalphung turte an sawiho.