India leh Singapore-in online payment system thlunzawm

22nd February, 2023

India leh Singapore chuan ram pahnihte'n cross border money transfer awlsam zawka an tih theihna turin nimin khan online payment system an thlunzawm. Video conference hmangin prime minister Narendra Modi leh Singapore prime miniter Lee Hsien Loong-te chuan cross-border connectivity hi an hawng a ni.

India-a mobile-based payment system, Unified Payment Interface (UPI) leh Singapore-a PayNow hmangin ram pahniha chengte hian rang zawk leh hautak lo zawkin pawisa an transfer thei tawh dawn a ni. Payment system thlunzawmnaah hian mobile phone number hmangin, ram pahniha chengte hian UPI virtual payment address (VPA) hmangin pawisa an inthawn thei tawh ang.

Prime Minister Modi chuan online payment systems thlunzawm hi ram pahnih mipui, a bikin zirlai, professional leh an chhungten an chhawr ṭangkai dawn hle a ni, a ti. Sorkar data thar bera a landanin, Singapore-ah hian Indian nuai 6.5 vel an awm mek a ni.

Nimina virtual hmanga online payment systems link hawnnaah Reserve Bank of India (RBI) governor Shaktikanda Das leh Monetary Authority of Singapore (MAS) managing director Ravi Menon-ten an hmanpui a, Das leh Menon hian cross-border system transaction hmasa ber turin pawisa an inthawn tawn nghal a ni. A bul ṭanna atan UPI-PayNow link hmangin India ram aṭangin ni khatah Rs 60,000 thleng thawn theih a ni ang.

Modi chuan UPI hmangin kum 2022 khan transaction tluklehdingawn 74, Rs trillion 126 chuang hu tih a nih thu sawiin, UPI system chu hmantlak leh him tawk a nih thu a sawi. UPI-based payment system hian ngaih pawimawh pawh a hlawh chho hle a, kumin January thla khan National Payments Corporation of India (NPCI) chuan UPI hmanga international phone number-a transaction tih theihna tur pawh a lo siam tawh a ni. Union cabinet meeting pawhin kum 2022-23 chhunga BHIM-UPI transaction chawilarna tur scheme pawh a pawm bawk a ni.

Tun thla tir lam khan PhonePe chuan UPI international payment tihna tur hawngin, India mi ram pawna zinte chu ramdanga an thil leinaah UPI hman theihin a siam bawk.