Mumbai-a Shiv Sena Bhavan kawtah Thackeray lamṭangte inkhuar

Election Commission of India-in Shiv Sena party hming leh symbol-te Eknath Shinde lamṭangte kuta a pek tak avanga lungawi lohna lantir chhunzawm zelin, Uddhav Thackeray lamṭangte chu Mumbai-a Shiv Sena Bhavan kawtah an inkhuar. Bhavan hi Shinde lamṭangte kuta a awm lohna turin dan an tum a ni.

Shiv Sena party hi Shinde kaihhruai leh Thackeray kaihhruai pawl hniha an phel hnuah, ECI chuan Shinde lamṭangte a ziding zawkah pawmin, party hming leh symbol (bow and arrow) pawh an chhawm turin thutlukna a siam a ni. ECI rorel danah Thackeray lamṭangte an lungawi lo a, Supreme Court-ah petition pawh an thehlut tawh bawk.

ECI thutlukna puan hnu hian Shiv Sena party bank account leh thil neihte chu Shinde lamṭangte kutah hian a hlan nghal a ni. Lok Sabha Secretariat pawhin Parliament House-a Shiv Sena office chu Shinde lam pawlte kutah a dah tawh bawk. ECI thutlukna puan hma chuan he office hi Thackeray leh Shinde lamṭangte hian an hmang dun ve ve a ni.

SC-in Thackeray-a petition a ngaihtuah dawn

Supreme Court chuan Uddhav Thackeray-a'n Shiv Sena party hming leh symbol chhawmtu tura Election Commission of India (ECI) thutlukna siam a khin letna chu vawiin hian a ngaihtuah dawn.

Thackeray hian February 17-a ECI thutlukna siam hi dansak turin Supreme Court-ah hian ngen a ni. A petition thehluh hi chief justice of India DY Chandrachud kaihhruai bench chuan vawiin chawhnu lam hian a ngaihtuah dawn a ni.