Delhi Mayor thar atan AAP candidate Shelly Oberoi thlang tling

Aam Aadmi Party candidate Shelly Oberoi chu Delhi Mayor thar atan thlan tlin a ni a, BJP candidate Rekha Gupta chu vote 34-in a hneh.

Supreme Court-in nominated member te chu vote thlaknaah an inhnamhnawih tur a ni lo tia thuchhuah an siam hnuah, Oberoi hian vote 150 hmuin, a khingpui BJP candidate Rekha Gupta chuan vote 116 a hmu thung. AAP leh BJP te inkarah inhmuhthiam lohna a chhuah fo avangin Delhi Mayor thlanna hi ṭum thum lai tih ṭhuanawp a nih hnuah, SC court thupek angin Nimin khan a vawi lina atan vote thlak leh a ni a, AAP hi an dingchang zawk a ni. Delhi chief minister Arvind Kejriwal chuan Oberoi a lawmpui thu sawiin, "Delhi mipuite an chak a, suahsual rawngbawl chingte chu hnehin an awm ta" tiin BJP a kap zui.

Delhi-a East Patel Nagar ward aiawh councillor Oberoi hi a vawi khat dinnaah a tling nghal a, Delhi University-ah assistant professor hna thawk lai a ni. Kum 39 mi Delhi Mayor thar hi a eizawnna kawngah a thawhṭhat avangin chawimawina ṭhahnem tak a lo dawng tawh bawk. Oberoi hian BJP member Satya Sharma hnen aṭangin presiding officer hna chu chelhzui a ni.

Nimin tlai vek khan AAP candidate Aaley Mohammed Iqbal chu deputy mayor atan thlan tlin ni bawkin, BJP mi Kamal Bagri chu vote 31 in a hneh. Oberoi chuan House zahawmna vawng chungin, ṭha taka kan thawhho theihnan theihtawp a chhuah tur thu sawiin, "Naktuk aṭangin kan councillor zawng zawngte'n hna an thawk ṭan nghal ang. Khawpuia hnawmhnawkte chu thenfai vek an ni ang" tiin hnathawh nghal an tum thu a sawi.

AAP hian December 4-a ward 250 awmna MCD inthlanah khan ward 134 lain chiang takin hnehna an lo chang tawh a, BJP-i'n kum 15 chhung zet ro a lo rel tawhna chu an titawp a ni. BJP hian ward 104 lain pahnihna an ni a, Congress chuan seat kua chauh an la phak a ni.