Paper leak vangin HP-in State Staff Selection Commission ṭhiat

Himachal Pradesh-a Congres sorkar chuan nikum December thlaa paper leak vangin, Thawhlehni khan Himachal Pradesh Staff Selection Commission (HPSSC) chu a ṭhiat.

Chief minister Sukhvinder Singh Sukhu chuan, paper leak hriat a nih aṭangin Commission hna thawh hi tihtawp nghal a nih thu a sawi a, departmental inquiry and vigilance bureau report aṭangin kum thum chhung chu examination paper hi putruin, mi ṭhenkhat hnenah hralh a lo ni ṭhin tih hriatchhuah a ni, a ti. Hei vang hian state sorkar chuan commission ṭhiah nghal hi a rel ta a ni, tiin

a sawi.

HPSSC hnuaia recruitment neih mek chu Himachal Pradesh Public Service Commission (HPPSC), Shimla kutah hlan niin, candidate-te tan pawh an remchan dan dang anga ruahmanna siamsak an ni dawn tih CM chuan a sawi bawk. HPPSC hian recruitment examination a buaipui vek tawh tur thu sawiin, Staff Selection Commission hnuaia thawkte chu department dangah dah an ni dawn a ni, a ti.

HPSSC examination paper leak chungchang chhuina report-ah hian, kum thum chhunga dik lo taka thiltihnaah hian sorkar official tam tak an inhnamhnawih tih tarlan a ni a, chargesheet pawh thehluh thuai tum a ni bawk.

Nikum December 23 khan HPSSC hnuaia JOA (IT) examination paper leak hriatchhuah a nih avangin, December 25-a exam neih tur chu ṭhulh a ni a, he thil thleng kaihhnawihah hian HPSSC senior assistant Uma Azad chu man a ni. A kut aṭang hian solved question paper bakah pawisa fai, Rs nuai 2.5 man a ni bawk. Paper leka kaihhnawihah hian mi dang pariat man an ni tawh bawk a ni.