Amit Shah hi Maharashtra hmelma No 1 a ni : Saamna

Uddah Thackeray kaihhruai Shiv Sena (Uddhav Balasaheb Thackeray) chuan an party chanchinbu, 'Saamna' editorial-ah union home minister Amit Shah chu 'Maharashtra Enemy No. 1' tiin a sawi.

"Shiv Sena party hming leh symbol an lei hnuah, BJP chu hlim takin an lam a. Shinde lamṭangte ai pawhin BJP hi an hlim zawk. Shinde lam hian dawra thil kan lei ang chiahin party hming leh symbol chu an lei ngei a ni tih hi thuruk pawh a ni tawh lo," tiin Saamna-ah hian an ziak a ni.

Maharashtra-a zin mek, Amit Shah hian Shivaji Maharaj piancham lawmna inkhawm buatsaihah, Shinde lamṭangte hnenah Shiv Sena party hming leh symbol pek an ni chu lawmawm an tih thu leh, a hlim thu a lo sawilang a ni. Hei hi Thackeray pawl lam hian an haw hle a, Amti Shah chu Maharashtra leh Marathi mipuite hmelma 'number one' a ni, tiin Marathi-te chuan inthlan lo awm turah BJP hruaitu chu zirtirna an pe ngei dawn tih an tarlang bawk.

Hetih lai hian party hming leh symbol pek an nih hnuah, chief minister Eknath Shinde chuan vawiin hian Shiv Sena national executive meeting hmasa ber a ko. Meeting-ah hian office bearers thar pawh thlan nghal tum a ni tih an pawl thupuangtu, Deepak Kesarkar chuan a sawi.

Shiv Sena constitution siamṭhat rawtna pawh meeting-ah hian an sawiho rin a ni a, Shiv Sena MLA, MP leh senior leader-te chu kim vek tura hriattir an ni.