Gujarat-a Morbi lei chima thi chhungte Rs nuai 10 ṭheuh pe turin Oreva Group hriattir

Gujarat High Court chuan nikum October thlaa Morbi lei chim vanga thi, mi 135 chhungte hnenah zangnadawmna, Rs nuai 10 ṭheuh pe turin lei siamṭhat hna thawktu, Oreva Group a hriattir.

Nilaini khan Court chuan hriattirna hi tichhuakin, thi chhungte hnenah Rs nuai 10 bakah, hliam tuarte hnenah Rs nuai 2 ṭheuh pe turin a ti a, kar li chhung ngeia pawisa hi pe turin a ti.

British hun laia siam, Machcchu luia Morbi lei chim chungchanga PIL thehluh hi chief justice Sonia Gokani leh justice Sandeep Bhatt awmna bench chuan ngaihtuahin, thupek hi a tichhuak a ni. Court chuan central leh state sorkar chuan lei chima thi chhungte hi Rs nuai 10 a pek tawh thu a tarlang bawk.

Justice Gokani chuan, "Company chuan thi chhungte hnena Rs nuai 5 leh hliam tuarte hnenah Rs nuai 1 a pek tur thu a sawi a, mahse hei hi a tawk lo," tiin sum pek tur hi a tipung a ni. Thi chhungte aiawha ding, advocate KR Koshti chuan chhungkaw tam takin an eizawngtu ber an chàn a, an nupui fanaute dinhmun harsa takin a awm a ni, a ti.

Nikuma Morbi lei chim chungchangah hian he lei cheiṭhat hna thawktu, Oreva Group chu mawhphurtuah puh a ni. State sorkarin a din, Special Investigation Team (SIT) chuan firm lam hnathawh danah thil fel tawk lo tam tak a awm thu a lo hailang tawh bawk.

Lei chim kaihhnawihah hian mi 10 man an ni tawh a, an zingah hian Oreva Group MD Jaysukh Patyel pawh a tel.