Supreme Court-i'n thutlukna a siam hma loh chuan Adani-Hindenburg chungchang puangzar dawn lo

Supreme Court chuan nimin khan media te'n Adani-Hindenburg buaina chungchanga thuchiang zawk hriat an ngenna chu hnawlin, court-i'n thutlukna mumal tak a siam hma loh chuan mipui hriatah puanzar a ni tawh dawn lo tih nimin khan a sawi.

Hindenburg Research-i'n inbumna thil kalpuia an puh hnuah, Adani Group share hi nasa taka a tlakhniam avangin SC chuan February 20 khan PIL eng emaw zat lo lutte chu dahṭhat lailawk a nih tur thu a puang.

Chief Justice DY Chandrachud kaihhruai bench chuan hemi chungchanga dilna rawn thlentu advocate ML Sharma ngenna chu a hnawl a, "Media hnenah thuchhuah engmah siam a ni lo ang," tiin Chief Justice bakah , Justices PS Narasimha leh JB Pardiwala awmna bench chuan a sawi.

Court sang ber chuan petitioner zinga mi pakhat rawtna leh, Forbes-i'n report a tlangzarhte chu an record loh thu Thawhṭanni khan a puang a. February 17 khan, Sorkar laipuiin stock market-ah regulatory measure chakzawk a awm theihna tura mithiam rualte'n rawtna, proposed panel an siam pawh an pawm duh lo tawh bawk a ni. Court chuan an hnawl chhan sawifiahin, investor-te tana langtlang taka kalpui an duh vanga rawtna hi hnawl an nih thu an sawi. Nimin tlai thleng khan, court sang berah hian PIL pali thehluh a ni tawh a, lawyer M L Sharma leh Vishal Tiwari, Congress leader Jaya Thakur leh activist Mukesh Kumar te chuan PIL hi an thehlut tawh a ni.

Hindenburg Research-i'n Adani Group chu fraudulent transactions leh share price manipulation nasa taka kalpuiah a puh avangin an stock chu a tlahniam nasa hle. Adani Group chuan an puhna hi an pha thung a, sumdawnna an kalpui danah dan leh dunte felfai taka an zawm ṭhin thu an sawi thung a ni.