Ni 3 awh tur Congress Plenary Session ṭan

Congress party 85th plenary session chu nimin aṭang khan Chhattisgarh khawpui, Raipur-ah neih ṭan a ni a, ni thum a awh ang.

Plenary session-ah hian Congress president thar, Mallikarjun Kharge chu official-a party hruaitu lu ber atan pawm a ni dawn. Ni thum session neih chhung hian thutlukna pawimawh tak tak an siam rin a ni a, nakkum Lok Sabha inthlanpui neih tura tana party hmalak dan turte pawh a ruahman rin a ni bawk.

Session-ah hian ram chhung hmun hrang hranga party aiawh, mi 15,000 vel an tel rin a ni. A ni hmasa berah hian Central Working Committee aiawhtu, steering committee chuan CWC hi thlan nawn a nih dawn leh dawn loh an ngaituah ang. CWC hmasa chu ṭhiah a lo ni tawh a ni. Tlai lamah subjects committee meeting nei bawkin, resolution paruk an pulut. Party president thar Kharge hian party inrelbawlna kawngah a kut phuarsak a nih loh zia lantirna turin, a kaihhruai steering committee meeting-ah hian Gandhi chhungkua, Sonia Gandhi, Rahul Gandhi leh Priyanka Gandhi Vadra-te chuan tel an tum lo.

Vawiin hian resolution putluh zinga political, economic leh international kaihhnawihte ngaihtuah a ni dawn a, naktukah agriculture, farmer welfare, social justice and empowerment, youth, employment leh education kaihhnawih resolution-te ngaihtuah a ni bawk ang.

Naktuk hian party president-in session-ah hian thu a sawi dawn a, tlai lamah public meeting buatsaih a ni ang.