Rajasthan sorkarin job guarantee scheme hnuaia hnathawh ni tipung

Rajasthan chief minister Ashok Gehlo chuan Indira Gandhi Urban Employment Guarantee Scheme hnuaia ni 100 inhlawhna siam ṭhin chu, ni 125-ah a tipung.

State sorkar chuan thuchhuah siamin, central sorkarin Mahatma Gandhi NREGA a siam zulzuia he scheme siam hi khawpuia cheng, hna nei lo mi tam tak a pui a ni, a ti.

Inhlawh theih ni zat a tihpun hi April 1,2023 aṭangin hman ṭan a ni ang. Inhlawh theih zat ni 25-a tihpun a nih avang hian state sorkar chuan cheng vaibelchhe 1,100 vel a senbelh dawn niin sorkar thuchhuah chuan a tarlang.

He scheme hi Rajasthan chuan kum 2022-23 aṭangin a kalpui a, nikum budget-ah khan he scheme hnuaia ni 100 inhlawhna siamna atan Rs vbc 800 a dah a ni. Job card hmangin he scheme hnuaiah hian an inhlawh thei a, Jan Aadhaar card an neih a ngai bawk. Sorkar chuan field hrang hrang - environmental protection, water conservation, heritage protection, cleanliness, public service hnuaiahte inhlawhna hi a siamsak ṭhin. Job card hi mi nuai 4.51 hnenah pek ni tawhin, member nuai 6.94 chuang chu inhlawhna siamsak an ni tawh bawk.