CBI Office-ah Delhi Deputy CM Manish Sisodia inlan

Central Bureau of Investigation (CBI) in Delhi liquor policy case kaihhnawiha thu zawhfiah tura an koh angin, nimin khan Delhi deputy chief minister Manish Sisodia a inlan.

Sisodia hian CBI office a pan hmain Mahatma Gandhi memorial Rajhat tlawh hmasain amah thlawpa AAP member pungkhawmte hnenah thu a sawi. Sisodia chuan, "Jail-ah thla 7-8 vel ka lo tang a nih pawhin hrehawm ti loin min chhuang zawk ang che. Prime minister Narendra Modi hian Arvind Kejriwal hi a hlau a, kei ngei pawh thu belhchian dawn loah min awhtir a tum a ni," tiin a nupui chu a dam ṭha lo a, lo ngaihven sak turin a chah bawk.

Delhi chief minister Arvind Kejriwal chuan a twitter-ah Manish Sisodia chu duhsakna hlanin, jail-ah khung a nih pawhin ram leh khawtlang tana tang a ni dawn a, a ropui zawk tih sawi. Delhi mipuite chuan jail aṭanga rawn chhuah hun chu nghakhlel takin an lo thlir reng dawn tih a sawi zui bawk.

CBI hian February 19 khan thu zawhfiah turin Sisodia hi an ko a, mahse Delhi-a AAP sorkarah finance minister a nih avangin budget siamna atan kar khat hun pe turin a dil a, hei hi remtih sakin niminah khan an sawn ta a ni.

Delhi-a AAP sorkarin liquor sale policy thar a siam hi titawp leh tawh mah se, he policy kaihhnawihah hian Sisodia leh mi dang ṭhenkhat chu dik lo taka thiltia puhin thubuai siamsak an ni. Lieutenant governor VK Saxena chuan nikum khan he case hi CBI kuta hlan turin thupek a tichhuak a ni. Sorkar hian new policy hi titawpin, old liquor policy a hmang leh tawh a, sum tam tak an hloh chhanah Delhi Lt Governor chu mawhphurtuah an puh.

AAP chuan Lt Governor-in CBI kuta case hlanna tur thupek a siam chungchangah, a phenah BJP chu a awm niin an puh. Central sorkar aiawh, Lt Governor chu BJP chuan Delhi-a AAP sorkar tihchhiatna atan hmanruaah an hmang niin an sawi.

CBI office-ah Sisodia koh a nih vanga AAP hruaitu ṭhenkhat, lungawi lohna lantira CBI headquarters bula pungkhawmte chu Delhi police-ten an hreng. Party hruaitu hren zingah hian Rajya Sabha MP Sajya Singh, Delhi minister Gopal Rai leh MLA pathum an tel. Police-in an hrente hi mipa 42 leh hmeichhia pariat an ni.