Denmark Crown Prince leh a nupui an rawn zin

Denmark crown prince Frederik André Henrik Christian leh a nupui, crown princess Mary Elizabeth-te chu ni li cham turin nimin khan India-ah an rawn zin.

Kum 20 chuang chhunga Denmark lal chhungkuaten India ram an rawn tlawhna hmasa ber a ni.

Ministry of external affairs (MEA) in a tarlan danin, Denmark lalte nupa hi vice president Jagdeep Dhankar-a'n a sawmna anga rawn zin an ni. Ministry thupuangtu Arindam Bagchi chuan an rawn zin hian ram pahnihte inlaichinna leh thawhdunna pawh a tinghet zual dawn a ni, a ti.

An cham chhungin Denmark crown prince-te nupa hian Agra leh Chennai an tlawh dawn a, March 2 hian Chennai aṭangin an ram an pan ang. Denmark foreign minister Lars Løkke Rasmussen, environment minister Magnus Heunicke leh minister for climate, energy and utilities Lars Aagaard-ten an rawn ṭawiawm a ni.