PM Modi-a'n Mann Ki Baat vawi 98-na hmang

Prime minister Narendra Modi chuan thla tina radio programme a hman ṭhin, Mann Ki Baat vawi 98-na chu nimin khan a hmang.

Mann Ki Baat hi thla tin Pathianni hnuhnung berah Prime Minister hian a hmang ṭhin a, kum 2014, October 3 khan a programme hmasa ber hi a hmang a ni.

PM Modi chuan Digital India hmasawnna chungchang sawilangin, hemi entirna ṭha tak chu UPI (Unified Payments Interface) system leh e-Sanjeevani App te a nih thu a sawilang. Covid-19 hripui a len laia E-Sanjeevani app kaltlanga teleconsultation neih chu mipuite tana a ṭangkai zia sawichhuakin, he app kaltlang hian teleconsultation hi vaibelchhe 10 chuang neih a ni, a ti.

India-in digital lama hma a sawn chhoh chakzia pawh sawiin, PM chuan ram dang tam tak chuan India UPI chu an ngaihven tawh a, tun hnaiah pawh India leh Singapore chuan UPI-Pay Link an hawng a, ram pahniha chengte chuan awlsam takin, an mobile phone hmangin pawisa an inthawn thei tawh tih a sawi.

Faina beihpui thlakna, Clean India kalpuinaah mipuite chu theihtawp chhuah zel tura chahin, plastic bag-te chu puan-a thlak turin a chah nghal bawk a ni.