Delhi Dy CM Sisodia man a nih vangin AAP in 'Black Day' hmang

Delhi-a rorellai party, Aam Aadmi Party (AAP) chuan central bureau of investigation (CBI)-in Delhi deputy chief minister Manish Sisodia an man avanga lungawi lohna lantirin, nimin khan state hrang hrangah 'Black Day' an hmang.

CBI hian Delhi sorkarin kum 2021-21 chhunga excise policy a siam leh kalpui danah thil dik tawk lo awma sawiin, he thilah hian Deputy Sisodia hi inhnamhnawihah a puh. Pathianni khan an office-ah thu an zawtfiah a, an man zui a ni. Thu zawhfiah a nih laia Sisodia thlawpna lantira CBI office bula AAP pungkhawm zingah an hruaitu 50-te pawh an hreng a, darkar 24 chhung an hren hnuah an chhuah leh a ni.

AAP chuan nimin khan Delhi bakah Chandigarh, Bhopal leh khawpui dangahte lungawi lohna hi lantir a ni.

Delhi chief minister, AAP hotu Arvind Kejriwal chuan CBI officer zinga a tam zawk chuan Sisodia man hi an duh bik lo tih a sawi a, mahse chunglam aṭanga political pressure a nasat avangin an man a ngai ta a ni, a ti. Liquor policy chungchanga Sisodia an puhnate pawh engmah finfiahna awm lo a nih thu a sawi bawk.

Nikum June thla khan Delhi health minister hlui, Satyendar Jain chu he policy kaihhawihah hian man a lo ni tawh bawk. Hetih lai hian AAP chuan heng minister pahnihte hi Delhi-a AAP sorkarin education leh health service lam siamṭhatna kawnga hlawhtling taka hma latute an ni a, ram pumah an party dinhmun chawilartu leh hlawhtlinna a neih chhohna kawngah mi pawimawh an ni tih an sawi. Hei vang hian BJP chuan an hnathawh leh hlawhtlinna hi ngaimawhin, central agency-te dik lo taka hmangin a rawn bitum ta niin an puh.

CBI hian Pathianni khan Manish Sisodia chu darkar riat chhung zet thu an zawt a, mahse a chhanna pekah an lungawi tawk lo nia sawiin an man chhan an sawi. Investigator-te chuan Sisodia hian a thawhpui ṭha tawk lo niin an ngaih thu agency official-te chuan an sawi. Hei vang hian ngunthluk tawka zawhfiah leh turin hren zui a ngai tih an sawi a ni.

Hetih lai hian Sisodia chuan an puhnate chu thil dik lo leh phuahchawp mai a ni tiin, a dikna hailang tur chuan thla 7-8 chhung jail tan pawh a inhuam thu a lo sawi lawk a ni.

AAP thupuangtu, Saurabh Bharadwaj chuan nimin khan chanchinthar lakhawmtute kawmin, "Thil thlen chhoh dan hi a hlauhawm hle a ni. Indira Gandhi-i'n Emergency laia a lo tih tawh ang chiah kha vawiinah Modi-a sorkar chuan a ti ve leh ta. Hruaitu langsar tak takte chu chhan mumal tak awm loin man an ni chho ta fo a ni. Sorkar laipui hnenah man an nih chhan hi chiang taka sawi turin kan phut a ni," a ti.

Bharadwaj chuan AAP sorkarin a tihtawp leh tawh, tuna Sisodia leh minister hlui Jain-te man an nihna, Delhi excise policy chu siam a nih khan khatih laia Delhi lieutenant governor, sorkar laipui ruat Anil Baijal ngei pawhin a pawmpui tih sawiin, CBI hian engvanga LG hi thu zawtfiah ve si lo nge a ni tihte a zawt let bawk. Tuna an chet dan chu sorkar laipuiin AAP nuai chimit a tumna a ni tiin a sawi.