Delhi HC-in Agnipath Scheme laka petition thehlutte a hnawl

Sorkar laipuiin sipai lakna dan thar, Agnipath Scheme a siam chungchanga petition eng emaw zat lut chu nimin khan Delhi High Court chuan a hnawl.

Nikuma June thlaa sorkar laipuiin a tlangzarh, Agnipath Scheme hnuaia sipaia ṭang turte hi kum li chhung atan lak an ni. Kum li hnuah Agnipath scheme hmanga sipai lut, Agniveer zinga 25% chauh chu regular service tir an ni dawn, a bak chu an chawl zui ang. He scheme hi tlangzarh a nih aṭangin ram chhung hmun hrang hrangah duh lohna lantirin, hmun ṭhenkhatah chuan buainate a chhuak a ni.

Agnipath Scheme duh lohin court-ah petition eng emaw zat thehluh a ni a, mahse nimin khan Delhi High Court chuan he scheme hi ram tana ṭha zawk tur ngaihtuah a, sipaite thuam ṭhat an nih theih zawkna tura duan a ni tiin, chief justice Satish Chandra Sharma leh justice Subramonium Prasad awmna bench chuan petition te chu a hnawl. Bench chuan Agnipath recruitment scheme-ah hian an in lo inrawlh vena chhan tur a awm lo tih a sawi bawk.