PM Modi-a'n loneitute ṭanpuina Rs vbc 16,800 pe chhuak

Prime minister Narendra Modi chuan PM-Kisan income transfer scheme hnuaia loneitute tana chhawmdawlna pek, 13th instalment-na tur Rs vbc 16,800 chu nimin khan a pe chhuak.

PM-Kisan hnuaiah hian ram chhunga loneitu vaibelchhe 8 chuang chu chhawmdawlna, kum khatah Rs 6,000 ṭheuh pek ṭhin a ni. Heng sumte hi direct-in an bank account-ah ṭum thum, Rs 2,000 zelin thunsak an ni.

He scheme hi kum 2019, February thla khan kalpui ṭan niin, tun thlengin ram puma loneitu vaibelchhe 11 chuangin ṭanpuina hi an dawng tawh a, Rs vbc nuai 2.2 semchhuah a ni tawh.

Financial year kal mekah fund 11th leh 12th instalment chu nikum May leh October thla khan semchhuah a lo ni tawh bawk. Agriculture ministry chuan PM-Kisan scheme hi loneitu tam takin chhawr ṭangkaiin, an sum lakluh leh agriculture sector hmasawnna kawngah a pui hle a ni, a ti.

PM-Kisan hi central sector scheme niin, funding hi sorkar laipuiin 100% a tum a ni. He scheme hmanga hamṭhatna dawng turte erawh chu state sorkarin guideline a siam hmangin a thlang ṭhin.