Sisodia-a'n CBI-in an man chungchang Supreme Court-ah a khing let

Delhi deputy chief minister Manish Sisodia chuan, Delhi excise policy, 2021-22 kaihhnawiha central bureau of investigation (CBI) in an man chungchang chu Supreme Court-ah a khing let.

Chief justice of India DY Chandrachud chuan Sisodia-a lawyer, Abhishek Shinghvi hnenah, CBI thiltih dan an khin let chungchang hi High Court-a kal hmasa loa Supreme Court-a direct-a an kal chhan a zawt a, Singhvi chuan Vinod Dua case chungchanga Supreme Court thutlukna siam dan avanga ti an nih thu a sawi ve nghal. Hemi hnu hian Chief Justice chuan nimin tlai lama ngaihtuah turin a ti zui ta a ni.

Kum 2021 June thla khan Supreme Court chuan Covid-19 hri leng chungchanga sorkar laipui hmalak dan a sawisel avanga ram phatsantua puhna thubuai siamsak, journalist Vinod Dua chuan Supreme Court-ah khing letin, Court hian a case hi a lo tihtawp sak a ni.

Delhi court chuan Thawhṭanni khan Sisodia hi liquor policy case-ah Sisodia hi CBI kuta ni nga awm turin a rel. CBI hian liqour policy kalpui dana dik tawk lo awm chungchangah, Sisodia hi thu zawh belh turin hun an la mamawh niin a sawi a ni. Delhi liquor policy hi nikum khan sorkar chuan a titawp leh tawh a ni. CBI chuan Sisodia thu an zawhfiah tawhnaah an chhanna a pek dan chu a lungawithlak loh nia sawiin, hun pek belh tur hian an ngen.

CBI chuan liquor policy case an chhuinaah hian middleman, trader leh bureaucrat-te hmanga an duh dan anga thil kaltir tura chhim lama sumdawng lian leh politician-te inrawlh dan chu an thlur ber a nih thu a sawi. He case kaihhnawihah hian Telangana chief minister K Chandrasekhar Rao-a fanu, Kalvakuntla Kavita-i chartered accountant hlui, Butchibabu Gorantla pawh an lo man tawh bawk. Butchibabu hi Delhi exice policy duanna leh kalpuinaah a inrawlh nia puh a ni.

Delhi-a rorellai, Aam Aadmi Party (AAP) leh eptu party dang, Trinamool Congress leh Samajwadi Party-te chuan CBI-in Sisodia an man chu an dem thu an sawi. AAP chuan prime minister Narendra Modi leh a party, BJP chu Kejriwal leh Sisodia-te lar chho zel tur hlauah puhin, nakkuma inthlanpui neih tura an hmalak tumnate tihchhiat tuma theihtawp chhuahah an puh.

Trinamool Congress pawhin PM Modi chu na taka beiin, BJP chuan thawhpui tlemte, ED, CBI leh IT-te chauh a nei tawh a ni tiin, central agency-te a rawn bei tel nghal bawk.

Congress party hruaitu Jairam Ramesh pawhin PM Modi kaihhruai sorkar hnuaiah, central agency - ED, CBI leh IT department-te chu politics phuba lakna hmanrua an ni tawh a, heng institution-te hian an hnathawh leh nihna dik tak an hloh vek tawh a, eptu pawl hruaitu tihchhiat turte an thlang kual tawh mai mai a ni, tiin a sawi.

Hetih lai hian BJP chuan AAP hruaitute vauna atan sorkar laipuiin CBI a hmang lo tih a sawi ve thung. Eptute rawn lian chho zel tur danna atan sorkar laipuiin central agency-te dik lo takin a hmang ṭhin nia an puhna chu thudik lo a ni tih an sawi.