Kum 2022 chhunga internet shutdown thlen ngunna ber India
International digital rights organisation, Access Now in a tarlan danin, India chu kum 2022 chhung internet shutdown thlen ngun berna ram niin, hei hi a zawna kum nga internet shutdown ngun ber a nihna a ni bawk.
Kum 2022 chhung khan India ram thuneitute chuan internet service hi ṭum 84 vel titawpin, heng zinga ṭum 49 chu Jammu & Kashmir-a thleng a ni a, January leh February thlaah ni thum chhung curfew-style shutdown hi siam a ni, tiin Access Now report chuan a tarlang.
Rajasthan-ah shutdown hi ṭum 12, West Bengal-ah ṭum sarih, Haryana leh Jharkhand-ah ṭum li ve ve a thleng bawk.
Report chuan nawrh huaihawt, tualchhung buaina, school exam leh inthlan kaihhnawihahte thuneitute hian internet hi an titawp fo tih a sawi.
Access Now senior international counsel leh Asia Pacific policy director, Raman Jit Singh Chima chuan, "Khawvela democracy ram lian berah hian fundamental right beihna hi ṭum 84 zet a thleng. G20 hruaitu dinhmun chelh mektu leh 2024 inthlanpui nei mai tur ramah, hetiang thil thleng hi khawvel huap pawha thil zahthlak a ni," a ti.