Delhi Lt Governor-in minister 2 banna lehkha President hnenah thawn

Delhi-a Aam Aadmi Party (AAP) sorkara minister pahnih, Manish Sisodia leh Satyendar Jain-ten minister an nihna aṭang banna lehkha an thehluh chu, lieutenant governor VK Saxena chuan president Droupadi Murmu hnenah a thawn.

Delhi chief minister Arvind Kejriwal sorkara minister pawimawh tak pahnihte hi eiruk thubuaia man an ni ve ve a, Thawhlehni khan cabinet member an nihna aṭanga banna hi an thehlut a ni.

Kejriwal chuan minister pahnihte banna thehluh hi a lo pawmsak tawh bawk a ni.

Money laundering case-ah nikum May thla khan Enforcement Directorate chuan Satyendar Jain hi an man a, deputy chief minister Sisodia hi excise policy scam-ah chhui niin Pathianni khan central bureau of investigation (CBI) chuan thu an zawhfiah hnuah an man zui ve leh bawk.

Deputy chief minister Sisodia-a'n banna a thehluh hnuah, AAP sorkar chuan a portfolio chante chu minister lakluh belh an nih hma atan Kailash Gahlot leh Raaj Kumar Anand-te sem phawt an ni tih an puang nghal. Kum 49 mi, Kailash Gahloh chu Delhi sorkara minister zingah portfolio chang hnem ber a ni ta a ni. Sisodia a ban hma khan portfolio paruk a chang a, Sisodia ban hnuah department pariat enkawl tur pek belh niin, ministry 14 a chang ta a ni. A hma khan Sisodia hi ministry enkawl hnem niin department 18 a enkawl ṭhin.

CM Kejriwal chuan Sisodia leh Jain-te thlaktu atan hian Saurabh Bharwaj leh Atishi-te rawt nghalin, nimin khan Lt Governor Saxena hnenah an hming hi a thehlut ve nghal bawk. Minister thar turte hi darkar 48 chhunga tihfel hman tum a ni. CM chuan kar leh maiah Delhi budget pharh tum a nih tawh avangin, sorkar hmalaknate tluang taka kalpui a nih theihna atan minister thlaktu turte hi a ruat fel nghal a ni.