West Bengal-a adenovirus kai pung zel vangin CM-in emergency meeting a ko
West Bengal-a naupang zingah adenovirus kai an pun zel avangin, chief minister Mamata Banerjee chuan nimin khan health department official-te emergency meeting a neihpui.
CM Banerjee hoa meeting neih zawh hnuah, state health department chuan thuchhuah siamin, state chhunga hospital leh medical staff-te chu he hri veite enkawl dan chungchangah thurawn pein, medical college, district hospital leh block-level hospital-ah children's department chu darkar 24 chhung hawng turin a hriattir bawk.
State health department official chuan adenovirus vang hian an state-ah Thawṭanni khan Kolkata-ah naupang panga an thi tih a sawi a, hri hi a darh zel a hlauhthawnawm thu a sawi bawk. Hetih lai hian doctor-te chuan naupang thite hi virus vang a ni em tih erawh a chian loh thu sawiin, pneumonia vanga thi ni zawkin an sawi thung.
Adenovirus chu eng nge?
Adenovirus hian thawk lama harsatna leh ei/in kalkawng (intestinal tract) thlengin harsatna a thlen thei a ni. Hri kaite hi hritlang satliah anga awmte an awm laiin, a la na deuhte chuan khawsik, hrawk na, awm na, pneumonia, mit na bakah kawṭha lo leh luakte an nei ṭhin.
Doctor-te chuan nausen aṭanga kum 2 chinte chu he hri kai awlsam ber an nih thu sawiin, kum 2-5 inkarte pawh a kai awl zingah an awm a, kum 5-10 te chuan hri kai theihna 'chance' an nei bawk tih an sawi. Kum 10 chin chunglam erawhin an kai vak lo tih sawiin, hri kai tam zawk chu in lamah enkawl mai theih an nih thu an sawi.
Paeditrician Dr Agnimitra Sarkar chuan he hri hi ngaihven ṭhat a ngaih thu sawiin, "Nu leh pa tam zawk chuan hritlang satliahah te an ngai a, mahse an fate dinhmun a ṭhat theih loh hnuah hospital an rawn panpui leh ṭhin. School-ah pawh inkaihhruainate siam a ngai a, a darh zel lohna turin naupangte chu mask vuahtir an ngai a ni. Sanitizer an hman ṭhat a, social distance an ngaih pawimawh a ngai bawk," a ti. Naupangah hri kai an pun chhoh avangin nu leh pa ṭhenkhat chuan an fate chu school pawh an kaltir duh tawh rih lo a ni.