Adani Group chungchanga Hindenburg report zirchiang tur Supreme Court-in member 5 awmna expert committee a din

Hindenburg Research-in Andani Group chu sumdawnna a kalpui danah thil dik tawk lo tia a puhna report a tihchhuah chu zirchiang turin, Supreme Court chuan nimin khan member panga awmna expert committee a din.

Committee hi Supreme Court judge hlui, justice Abhay Manohar Sapre-a'n a ho dawn a, member dangte chu State Bank of India chairman hlui O.P Bhatt, Bombay High Court judge hlui justice J.P. Devadhar, New Development Bank of BRIC hotu hlui K.V. Kamath, Infosys co-founder Nandan Nilekani bakah securities expert leh lawyer Somasekhar Sundaresan te an ni.

Expert committee hian Hindenburg report-in Adani Group a puhna hrang hrangte chu zirchiangin, thla hnih chhungin Supreme Court-ah report an thehlut ang. Report an zirchiannaah hian market regulator Securities and Exchange Board of India (SEBI) bakah financial regulation kaihhnawih agency, fiscal agency leh law enforcement agency-te chuan committee hi an pui dawn bawk a ni. SEBI chuan material leh information an mamawh angte a pe vek dawn a, committee-in a sum senso zawng zawng hi sorkar laipuiin a tum vek ang.

Adani Group neitu, Gautam Adani chuan Supreme Court-in committee a din chu lawmawm a tih thu sawiin, hemi hmang hian thudik tak chu pholan a ni dawn a ni, a ti. Adani Group hian Hidenburg report-a an puhna hrang hrangte chu thu dik lo a nih thu leh, dik lo taka tih an neih loh thu a lo sawi fo tawh a ni. January 25-a Hindeburg report tihchhuah a ni hnuah Adani Group hi an stock a tlahniam nasa tawh hle a, an sum hloh hi Rs vbc nuai 12 vel zet a tling tawh a chhut a ni bawk.