President-in CEC leh EC-te a ruat tawh ang : Supreme Court

Supreme Court-a constitution bench chuan chief election commissioner (CEC) leh election commissioner (EC)-te chu high-powered committee thurawn angin, President-in a ruat tawh tur a ni, a ti.

Court chuan Prime Minis­ter, Lok Sabha-a Leader of Oppo­sition (LoP) awmna committee-in rawtna a thehluh zulzuiin, President hian CEC leh EC te hi a ruat tur a ni tiin, hei hi sorkarin poll body sang bera commissioner ruat chungchang a thununna tihtawpna tur a ni.

Supreme Court chuan parliament-ah Election Commi­ssioner-te ruatna kalpui dan tur dan siam a nih hma chu, high-powered committee chuan appointment chungchangah President hi thurawn a pe ṭhin ang, tiin a sawi. Tuna kalpui danah chuan Prime Minister thurawn leh duh dan angin CEC leh EC-te hi President hian a ruat ṭhin.

Advocate Prashant Bhushan, Kaleeswaram Raj, Aswhini Upadhyay leh senior advocate Gopal Sankaranarayanan-te chuan appointment hi langtlang leh rintlak zawka kalpui phutin Supreme Court-ah petition an thehlut a ni. Constitution bench chuan petition-te hi a ngaihtuah hnuah CEC leh EC ruat dan chu Central Bureau of Investigation (CBI) director ruat dan anga kalpui turin a rel ta a ni.

Thutlukna an siamah, justice Joseph chuan political party leh democracy-te dinhmun chu Election Commission kutah a innghat tih sawiin, Election Commission rintlak chuan inthlan kaihhnawih thilte chu zahawm takin a vawnghim a ni, mipuite pawhin an rin ngam a ni, a ti. "Ram mipuite chuan Election Commisisoner-te chungah beiseina sang tak an nei a ni. Mi tu emaw, thuneitu hmaa nem mai ṭhin chu Election Commissioner atana ruat tlak a ni lo. Amah ruattu laka ba nei anga inngai tlat a, an thu anga awm chu inthlan buaipuitu zingah hmun a nei ve thei lo ang. Election Commissioner chu hun khir tak a thlen pawha nghet taka ding, chak lo zawk leh dik lo taka an relsakte chhanchhuak ngamtu tur a ni. Chutiang chu midang rinchhan lo, mahni ro relna kalpuina dik tak chu a ni thei ang," tiin a sawi.

Eptu pawl, Congress party chuan CEC leh EC ruat chungchangah Supreme Court thutlukna siam chu lawmawm an tih thu sawiin, Enforcement Directorate hotu ruat chungchangah pawh he thupek hi hman ve an duh tel tih an sawi. Eptu party-te chuan BJP kaihhruai sorkar laipui chu central agengy-te thunun leh, dik lo taka hmang ṭangkaiah an lo puh fo tawh a ni.

Congress thupuangtu Abhi­shek Singhvi chuan prime minister Narendra Modi kaih­­hruai sorkar chu inthlan kalpui dan chungchangah dan bawh­chhe nasa ber a ni tiin, Court thutlukna siam chu democracy humhalh tura EC pawimawhzia a hriattir nawn lehna a ni, a ti. Supreme Court thupek sutna dan chu Parliament-ah pu lut lo tura sorkar vau lawk nghalin, hetiang zawnga hma a la nih chuan theihtawpa an dodal zel tur thu a sawi bawk.