New Delhi-ah Quad Foreign Minister meeting nei

Quad ram foreign minister meeting chu nimin khan New Delh-ah neih a ni.

Meeting hi external affairs minister Dr S.Jaishankar-a'n a kaihruai a, Quad member dang - Australia foreign minister Penny Wong, Japan foreign minister Yoshimasa Hayashi leh, US secretary of state Antony Blinken-te an tel a ni.

Nimina meeting neih zawhah thuchhuah inṭawm an siamah, Ukraine ram runtu, Russia an dem thu pawh an tarlang. Russia-in nuclear ralthuam hmanga Ukraine a vau emaw, a bei emaw chu pawmzam mai thei a ni lo tih an sawi.

Thuchhuah an siamah hian Quad foreign minister-te chuan Indo-Pacific region-a buaina a awmte boruak ṭha tak hnuaia chinfel ṭhinte an thlawp thu leh, member ramte zalenna, dan leh an ram china an thuneihna an inthlawpsak tlat thu an sawi nawn leh bawk.

Quad minister-te chuan February 16-a North Korea-in intercontinental ballistic missile (ICBM) a enchhin leh chu an dem thu sawi bawkin, hei hi UN Security Council resolution (UNSCRS) palzutna a ni, an ti. NKorea chu UN resolution hi zawm turin an ngen nghal bawk a ni.

Myanmar chungchang pawh an thuchhuahah hian sawilangin, tualchhung dinhmun ṭha lo cho zel chu ngaihven a ngai hle tih an sawi a, boruak muanawm siam a ṭul tawh hle a ni, an ti. Myanmar rama buaina chhuak fo chu tihtawp a ngai a, dik lo taka mante chu chhuah thuai tura an phut thu an sawi bawk.