AAP hruaitu Manish Sisodia man a nih chungchangah Eptu party 9-te'n PM Modi-a hnenah lehkha thawn

Delhi deputy chief minister hlui, Aam Aadmi Party (AAP) hruaitu Manish Sisodia man a nih chungchangah, eptu party pakua hruaitute chuan prime minister Narendra Modi hnenah lehkha thawnin, sorkar laipui chuan eptu hruaitute beihna atana central agency-te dik lo taka hmangah an puh.

Prime Minister hnenah lehkha thehluha hming ziaktu zingah hian Telangana chief minister K Chandrasekhar Rao, Punjab chief minister Bhagwant Mann, West Bengal chief minister Mamata Banerjee leh Delhi chief minister Arvind Kejriwal-te pawh an tel. Hetih lai hian Congress erawh chuan lehkha thehluttu zingah hian an tel lo a, DMK, JDU leh JDS pawh an tel lo bawk. Lehkhaa hming sign-tu dangte chu - National Conference hotu Farooq Abdullah, Nationalist Congress Party hotu Sharad Pawar, Shiv Sena Uddhav Thackeray, Samajawadi Party hotu Akhilesh Yadav leh Bihar deputy chief minister Tejashwi Yadav-te an ni.

Central Bureau of Investigation (CBI) chuan Delhi sorkarin kum 2021-22-a exice policy a kalpui kaihhnawiha Manish Sisodia hi thu an zawhfiah hnuin an man a ni.

Central agency dang, Enforcement Directorate (ED) chuan Young India-in National Herald newspaper enkawltu, Associated Journals Ltd a lakchhawn chungchanga Gandhi chhungkua pawh a lo chhui tawh a, nikum khan ED hian Rahul Gandhi leh a nu, Sonia Gandhi-te chu thu an lo zawtfiah tawh bawk.

Eptu hruaitute chuan, CBI chuan Delhi excise policy chungchangah thil fel tawk lo a awm nia sawiin Sisodia hi rei tak an umzui a, thil dik lo takin a ti tih finfiahna engmah nei si loin an man zui a ni, an ti. Kum 2014-a PM Modi-a kaihhruai sorkar a din aṭangin, central agency-ten politician an umzui leh chhuizuite chu a tam ber eptu lam pawl hruaitute an ni tiin, BJP zawmtu politician-te case erawh agency-te chuan an chhui muang hle thung a ni, an ti.

Assam chief minister Himanta Biswa Sarma chungchang pawh tarlangin, eptu pawlte chuan Sarma hi Congress party-a a awm lai, kum 2014 leh 2015 khan CBI leh ED chuan Saradha chit fund scam chungchangah an chhui a, mahse BJP a zawm hnuah a case hi an ngaihven zui ta lo a ni, an ti. Sarma ang bawk hian Trinamool Congress hruaitu hlui pahnih, Suvendu Adhikari leh Mukul Roy-te chu Narada sting operation case-ah ED leh CBI-in an chhui a, mahse BJP an zawm hnuah an case hi an buaipui tawh lo bawk a ni, tiin an tarlang.

Central agency-te hian kum tam tak thubuai, finfiahna awm siloa puh chungchangah mi an man mai lo a, uluk taka chhuichian a nih hnuah an thiam lo ngei tih finfiah a nih hnuah an man chauh ṭhin. Mahse eptu hruaitute chuan kum 2014-a central-a BJP a sorkar aṭangin, eptu hruaitute in dapsak te, an laka thubuai thehluh leh finfiahna awm hmaa man tawk an tam ta hle tih an sawi. Eptu hruaitute man leh thubuai siamsak hi inthlan nen a innang chho zel a, hei hian politics a inrawlh tih chiang takin a lantir a ni, an ti.