Covid symptom ang nei flu a leng, sorkarin thuchhuah a siam

India ramah Covid hri ni chiah lo, mahse a symptom ang nei flu a leng mek a, hei vang hian sorkar laipui chuan mipuite fimkhur tura chahin thuchhuah a siam a, tih tur leh tih loh turte a tarlang nghal bawk.

Influenza A subtype H3N2 hi thla hnih thum vel chu ram chhung hmun hrang hrangah a leng tawh a, khuh ro leh khawsikte neiin, tam tak chu damdawi-inah luh an ngai hial a ni. Indian Medical Association (IMA) chuan he flu veite'n khawsik an neih hi ni thum velah a reh ve leh mai a, mahse kar thum thlengte nasa takin an khuh zui niin an sawi. Hei vang hian awmze nei loa antibiotics-te ei mai lo turin a chah.

IMA chuan influenza A subtype H3N2 virus kaite hian antibiotics, Azithromycin, Amoxiclav leh a dangte eiin, an taksa a nawm deuh hnuah a course zo si loin an tawpsan leh mai a, hei hi a ṭha lo hle a, antibiotics mamawh tak tak hunah an taksaah a thawk ṭha thei tawh dawn lo a ni, a ti. Doctor-te pawh antibiotics lam chawh lo turin an ngen bawk.

Hri hi kum 15 hnuai lam leh kum 50 zingah vei an tam a, a la na deuhte chu an thawkna lamah harsatna a thlen a ni.

Indian Council of Medical Research (ICMR) chuan hri laka invenna turin mipuite chu kut sil fai ṭha a, face mask hmang tur leh punkhawmna hmunte pumpelh hram turin a ngen. Khawsik leh taksa kham/na an nei a nih chuan paracetamol ei turin a chah bawk.