CBI-in Bihar CM hlui Rabri Devi thu zawtfiah

Central bureau of investigation (CBI) chuan nimin khan Bihar chief minister hlui Rabri Devi chu land-for-jobs case kaihhnawihah Patna-a a chenna inah thu an zawtfiah.

Rabri Devi hi Bihar CM hlui vek, Rashtriya Janata Dal (RJD) hotu hlui ni bawk Laloo Prasad Yadav-a nupui a ni.

CBI chuan Rabri-i statement hi an la ringawt dawn tih sawiin, a in dap sak a ni lo tih an sawi a, a hmain appointment pawh a siam lawk niin an sawi.

Nimina CBI-in Rabri Devi thu an zawhfiah hma hian, eptu party pakua hruaitute chuan prime minister Narendra Modi hnenah lehkha thawnin, central-a BJP kaihhruai sorkar chu central agency-te dik lo taka hmang a, politics lama an hmelmate beihna hmanrua atana hmang ṭhinah an puh a ni. PM hnena lehkha an thawna hming ziaktu zingah hian Rabri Devi fapa, Bihar deputy chief minister ni lai Tejashwi Yadav pawh a tel.

CBI hian kum 2022, May thlaa Yadav leh a chhungte laka FIR thehluh kaihhnawihah Rabri Devi hi thu an zawtfiah a ni. FIR thehluhah hian kum 2004-2009 inkar, Laloo Yadav-a union railway minister a nih lai khan, sorkar hnaah mite thunin an hnen aṭang hian man tlawm takin amah leh a chhungte hminga ram a lei nia puh a ni a, FIR-ah hian Yadav-a bakah a nupui leh fanute leh, midang inhnamhnawiha puh mi 12 hming tarlan a ni. Nikum khan CBI chuan chargesheet a ziaklut a ni. Nikum July thla khan CBI chuan Yadav-a thawhpui hnai tak, officer on special duty (OSD) Bhola Yadav chu an lo man tawh bawk a ni.