Election Commission-in Shiv Sena hi min laksak dawn lo : Uddhav Thackeray

Shiv Sena (UBT) hruaitu Uddhav Thackeray chuan Election Commission-in Eknath Shinde lamṭang pawl hnena party hming leh symbol a chan chhunzawm tir chungchang ah EC chu na taka beiin, EC chu sorkar laipuia thuneituten an duh dan anga an thunun, an sal ang chauh a ni, a ti.

Party aṭanga lungawi loa chhuakte zawk hnena party hming leh symbol a chhawmtir danah, EC chu midang thupek anga kal mai a ni, a ti. A pa, Bal Thackeray-a din, Shiv Sena chu a lak aṭangin EC chuan a laksak thei dawn lo tih a sawi a bawk. "Election Commission hian party hming leh symbol chu min laksak a ni thei, mahse Shiv Sena erawh chuan engtikah mah min laksak thei lo ang," tiin EC-in thutlukna a siam hnuah rally a neihna hmasa ber, Pathiannia Khed-a hun a hmannaah a sawi.

Thackeray-a kaihhruai Shiv Sena party aṭang hian Eknath Shinde lamṭangte chu an chhuak a, party MLA tam zawkin an thlawp bawk. An party a phel hnuah party hming leh symbol changtu zawk nih inchuhin hun rei tak an buai a, EC chuan thla hmasa khan thutlukna siamin, Shinde lamṭangte chu a ziding zawkah thlangin, party hming leh symbol a chantir a ni. Party an phel avangin Maharasthra-a Thackeray kaihhruai ṭangrual sorkar a tlak phah a, hemi hnu hian Shinde chuan BJP thawhpuiin sorkar thar an siam a, chief minister-ah a awm zui a ni .

Uddhav Thackeray lamṭangte chuan EC thutlukna siam hi an pawm loh thu an sawi a, Supreme Court-ah an appeal a ni.

Thackeray chuan Shiv Sena nuaibo tumin BJP chuan theihtawpin hma a la a, mahse an thil tum hi a hlawhtling dawn lo tiin, Shiv Sena beih chu Marathi leh Hindu-te inpumkhatna tihchhiat tuma beihna nen a inang reng a ni, a ti.