Dan hluihlawn tawh 65 ṭhiahna tur bill sorkar laipuiin putluh tum

Union law minister Kiren Rijiju chuan March 13-a Parliament session chhunzawm a nih leh hunah, sorkar chuan dan hluihlawn tawh 65-te ṭhiahna tur bill puthluh a tum tih a sawi.

Nimina Goa-a 23rd Commonwealth Law Conference a hmanpuinaah, minister chuan kum riat leh a chanve liam ta chhungin dan hluihlawn leh ṭangkai tawh lo 1,486 chu tihtawp a ni tawh a, session chhunzawm leh turah dan 65 tihtawpna tur bill hi putleh tum a ni, a ti.

Ram chhunga court hrang hrangah thubuai tihkhawtlai hi vaibelchhe 4.98 vel a awm mek a, nitin thubuai thar a awm belh zel bawk avangin case hluite pawh hi chinfel zung zung theih a ni bik lo a ni, a ti. Hemi rual hian Indian judge-te chuan theihtawpin an thawk reng a, mahse an hna hi a hautak hle tih sawiin,a tlangpuia lakkhawmin judge hian ni khatah case 50-60 a buaipui ṭhin a ni, a ti.

"Judge ṭhenkhat chuan nikhatah case 200-te an buaipui a, mahse case tihkhawtlai hi a la pung zel tho a ni," tiin sorkar chuan case chinfelna atan hian technology a hmang mek tih a sawi.

Rijiju chuan case tikhawtlai mekte chinfel tur hian sorkar chuan e-court leh special project-phase III a siam a, hemi hmang hian Indian Judiciary chu paperless-a siam an tum tih a sawi bawk.