CBI-in union minister hlui Lalu Yadav thu zawtfiah; Medical protocol zawm ṭha turin CBI official-te hriattir

Central bureau of investigation (CBI) chuan nimin khan union railway minister hlui, Lalu Prasad Yadav chu land-for-jobs case chungchangah thu an zawtfiah. Thawhṭanni khan Lalu-a nupui, Bihar chief minister hlui Rabri Devi chu Patna-a a chenna inah he case kaihhnawihah bawk hian thu an lo zawtfiah tawh bawk.

Lalu Yadav hi tun hnaia Singapore-ah a kal (kidney) thlak a ni a, a hriselna dinhmun pawh a la ṭha lutuk lo. Hei vang hian CBI official-te chu thu zawh lai hian medical protocol zawm ṭha tura hriattirin, amah hnaih lutuk lo leh, face mask pawh vuah vek tura tih a ni.

Nimin chawhma dar 10.40 khan CBI official panga awmna team chuan New Delhi-a Lalu Prasad khawsak mekna, Pantara Park-a Mishra Bharti-ah kalin thu hi an zawtfiah a, darkar thum vel hun an hmang a ni.

Kum 2004 -2009 inkar, Lalu Yadav-a union railway minister a nih lai khan, sorkar hnaah mite thunin an hnen aṭang hian man tlawm takin amah leh a chhungte hminga ram a lei nia puh a ni. CBI-in he thil kaihhnawihah Yadav-te nupa bakah mi dang 14-te chu Prevention of Corruption Act hnuaiah chargesheet a ziaklut tawh a ni.

Eptu party dangte chuan land-for-jobs case-ah taksa chak lo taka awm mek, Lalu Prasad bakah a nupui thu zawhfiah thar leh an ni chu na takin an sawisel. Lalu Prasad-a fapa, Bihar deputy chief minister Tejashwi Yadav chuan CBI chetdan chu an chhungkuain BJP an dodal vanga phuba lakna niin a puh. "Central agency-te chuan BJP dodaltute lakah zel hma an la tih chu a rukin mitinin an hre tawh a ni," a ti. Congress general secretary Priyanka Gandhi Vadra pawhin, Lalu Prasad leh a chhungte chu BJP hmaa an kun duh loh vangin bitum leh beih zui an ni,tiin a sawi ve bawk.

Lalu Prasad-a fanu, a pa tan a kal petu Rohini Acharya chuan a pa dinhmun ngaihtuahawm tak a la nih laia CBI-in thu an zawtfiah chu a lawm lo hle tih sawiin, a pa chungah thil pawi eng emaw a thleng palh a nih chuan tumah a chhuah dawn lo tih a sawi. "Ka pa chu an zarbuai reng a, a chungah thil pawi a thleng palh a nih chuan tumah ka chhuah lo ang. Ka pa an tibuai reng hi a dik lo a ni. Hei hi kan hre reng ang," tiin a sawi. Rashtriya Janata Dal (RJD) hotu Lalu hi Singapore-ah a kal thlak a nih hnuin, February 11 khan India ramah a kir a, New Delhi-ah a fanu upa zawk, MP Misha Bharti bulah khawsa rihin a la inenkawl mek a ni.