India leh France-in joint military exercise nei

Indian army chuan nimin khan French army nen joint military exercise, FRINJEX-23 an nei.

Joint military exercise hi ni hnih awh tur niin, vawiinah chhunzawm a ni ang. Kerala-a Thiruvananthapuram-a Pangode Military Station-ah neih a ni. Ram pahnihten military exercise an neih dun ṭum khatnaah hian Thiruvananthapuram-based Indian Army leh French 6th Light Armoured Brigade-a company group-te an tel a ni. French contingent hian Thawhṭanni khan Kerala hi an thleng tawh a, officer paruk leh sipai 111 an tel.

Defence ministry-in a tarlan danin, exercise hi ram pahnih sipaiten tactical level-a thawhdunna ṭha leh zau zawk an neih theihna tura buatsaih a ni.

India leh France hi kum 1993 aṭang khan naval wargame, Varuna an nei ṭhin. Kumin January khan Varun vawi 21-na hi Western Seaboard-ah neiin, nuclear-powered French aircraft carrier Charles De Gaulle, frigates FS Forbin leh Provence, support vessel FS Marne bakah maritime patrol aircraft Atlantique-te an tel a ni. India-French joint air exercise Garuda pawh nikum khan a ṭum sarirhna chu Jodhpur air station-ah an lo nei tawh bawk.