PM Modi-a'n 10th webinar on budget hmanpui

Prime minister Narendra Modi chuan nimin khan 10th webinar on budget hmanpuiin, India Inc chu investment tipung tur leh, budget 2023-24-a tarlante chu hmang ṭangkai thiam turin a chah.

Prime Minister chuan a kaihhruai sorkar laipui chuan capital expenditure atana sum ruahman pawh Rs vbc nuai 10-ah tipungin, a la san ber ṭum a nih thu a sawi. "Ram chhunga private sector-te chu sorkar tihdan anga investment tipung turin ka ngen a, hei hi ramin a chhawr ṭangkai dawn a ni" a ti.

Modi chuan GST avangin tun hmaa chhiah vanga phurrit nasa tak awm ṭhin chu a tlahniam tawh a ni tiin, income tax leh coporate tax pawh tihhniam a ni a, hemi vang hian chhiah lut pawh a ṭha tawh zawk niin a sawi. Kum 2013-14-a gross tax revenue chu Rs vbc nuai 11 vel a nih laiin, kum 2023-24-ah chuan 200% zeta pungin, Rs vbc nuai 33 a tling niin a sawi. Individual tax return pawh kum 2013-14-ah Rs vbc 3.5 aṭangin, kum 2020-21 ah Rs vbc 6.5-a a pun chhoh thu a sawi bawk.

"Chhiah pek hi mipuite tihtur, ram indin chhoh zelna tur a ni. Chhian pek ṭhat a nih hian mipuiten sorkara rinna an nghah ngam zia a tilang a, an chhiah pek chu ram tan, mipui tan ṭha takin hman a ni dawn tih an ring nghet tlat a ni," tiin Prime Minister chuan a sawi.