Delhi excise policy case : ED-in Telangana CM fanu thu zawhfiah turin ko

Enforcement Directorate (ED) chuan Delhi excise policy case kaihhnawihah Telangana chief minister K. Chandrasekhar Rao-a fanu, K. Kavitha chu thu zawhfiah turin, vawiinah an office-a inlan turin a ko.

EC hian Thawhlehni khan he case kaihhnawihah hian thil dik lo tihnaa mawhphurtu ber zinga a puh, Arun Ramachandran Pillai chu an lo man tawh bawk.

Hetih lai hian Kavitha hian vawiin-a Women's Reservation Bill siam phuta Jantar Mantar-a political rally neih turah a tel dawn avangin, EC hmaah hian a inlan hman dawn lo niin a sawi. "Khua leh tui ka nih angin, investigating agency-te chu ṭha takin ka thawhpui zel dawn a ni. Mahse appointment ka lo neih lawk tawh avangin a ni hi sawn turin ka ngen ang," a ti.

Delhi excise policy 2021-22 kalpui dan dik tawk loa puha man, Delhi deputy chief minister hlui Manish Sisodia chu Tihar jail-ah dah a ni a, ED hian Thawhlehni khan a tanna hmunah Sisodia hi thu lo zawtfiah tawhin, darkar nga vel zet thu an zawt a ni.

Tualthattute bulah Sisodia dah a ni : AAP

Aam Aadmi Party (AAP) hruaitu Saurab Bharadwaj chuan Tihar jail-a tantir mek, an party hruaitu Manish Sisodia chu cell no 1-ah tualthattute nena dah an ni, an ti.

Bharadwaj chuan thubuai ngaihtuah hmaa hren, undertrial-te chu cell no 1-ah dah an ni ngai lo, a ti. Court chuan Sisodia hi a rilru a sawrbing theihna turin Vipassan cell-ah dah turin a ti a, hetih lai hian Sisodia chu tualthah thubuai eng emaw zat neite nen dah an ni, a ti. Sisodia chu ram chhunga misual hlauhawm ber berte bulah dah a ni tiin politics lama inhmelma ni mah se, Sisodia chunga sorkar laipui chet dan chu demin, hetiang em ema inhuatna lantir chu pawm theih a ni lo, tiin a sawi.

Central bureau of investigation (CBI) chuan February 26 khan Delhi excise policy case-ah Sisodia hi an man a, March 6 khan ni 14 chhung judicial custody-a awm tura tih a ni.