Hmeichhiate thuam chakna turin sorkarin theihtawp a chhuah zel ang : PM Modi

Prime minister Narendra Modi chuan nimin, International Women's Day pualin ram chhunga hmeichhiate duhsakna a hlan a, a kaihhruai sorkar chuan hmeichhiate thuam chakna turin theihtawp a chhuah zel dawn tih a sawi.

PM Modi chuan India ram hmasawnna kawngah hmeichhiate hnathawh chu fakin, Mann Ki Baat-a hmeichhe hlawhtlingte chanchin a lo sawi tawhte chu a twitter-ah a share nghal bawk.

President Droupadi Murmu pawhin hmeichhiate duhsakna hlanin, khawvela democracy ram lian bera President atana thlan a ni chu hmeichhiate thuam chakna peng pakhat a ni, a ti. Ram siamna kawngah hmeichhe tam takin tha an thawh nasa tawh hle a ni tiin, hemi rual hian grassroot level-a decision-making institution-ah hmeichhiate an tam laiin, a sang lamah erawh hmeichhia an tlem chho zel tih a sawi. Mipa leh hmeichhia chungchanga khawtlangin thlir dan hrang a neih ṭhin chu thlak a ngai tawh a ni, a ti.

Air India Group-in all-women crew flight 90 thlawh tir

Air India, Air India Express leh AirAsia chuan March 1 aṭang khan hmeichhe hlangin an enkawl, all-women crew flight 90 an thlawh tir tawh.

Air India Group hian March 1 aṭang khan all-women crew flight hi a thlawhtir ṭan a, Air India hian hmeichhe hlang enkawl hi domestic leh international-ah flight 40 thlawh tirin, AI Express-in international flight 10 leh AirAsia India-in ram chhungah flight 40 a thlawhtir bawk. Group-a thawktu zinga 40% chu hmeichhia niin, cockpit crew zingah pawh hmeichhia 15% an awm tawh a ni. Air India hi ram chhunga hmeichhe pilot nei ngah ber niin, mi 200 chuang an awm. Air India Express leh AirAsia India hian hmeichhe pilot 97 an nei bawk.