CRPF hmeichhe biker-ten Delhi- Chhattisgarh bike rally nei

Central Reserve Police Force (CRPF)-a hmeichhe 'Daredevils' 75-te chu nimin khan Delhi-a India Gate aṭangin Maoist hluarna, Chhatisgarh-a Jagdalpur panin bike rally an nei.

CRPF hmeichhe biker-te hian Jadgalpur thleng tur hian km 1,838-a thui an tlan dawn a, ni 17 an thang ang. Kawng lakah state panga an paltlang dawn a ni.

Minister of state for ministry of external affairs Meenakshi Lekhi chuan India Gate aṭangin CRPF hmeichhe biker-te hi a vai liam a ni. An tlan hma hian CRPF hmeichhiate chuan rifle drill an nei a, women pipe band leh drummer-ten rimawi an tum bawk.

CRPF Director General Sujoy Lal Thaosen chuan biker-te hian an kalkawngah school naupang, Anganwadi worker leh self-group-te hun an hmanpui nghal dawn tih a sawi. Bike rally-a tel zinga ṭhekhat chu a hmaa bike pawh la khalh ngai lo an ni a, mahse training ṭha tak pek an nih hnuah rally-a tel thei tur khawpin an thiam chho tawh a ni, a ti.

Bike rally hi March 25-ah Jagdapur-ah tawpin, hemi ni vek hian CRPF Anniverasary Parade an lawm nghal dawn a, union home minister Amit Shah-an a hmanpui dawn tih DG chuan a sawi bawk.

CRPF hnuaiah hian sipai nuai 3.5 vel awmin, ram chhunga Naxal hel hluarna hmunahte venhim hna thawk turin dah a ni a, firfiak chet hluarna Jammu and Kashmir-ah a awm bawk a ni.