Australia PM Anthony Albanese a rawn zin

Australia prime minister Anthony Albanese chu ni li cham turin Nilaini khan India-ah a rawn zin a, nimin khan prime minister Narendra Modi nen Ahmedabad-a Narendra Modi Stadium-a India leh Australia test cricket match khelh chu an endun.

Modi leh Albanese-te hian an ram team captain ve ve, Rohit Sharma leh Steve Smith-te chu Test cap an hlan a ni.

Australia PM chuan Ahmedabad-a an lo lawmna chu lawmawm a tih thu sawiin, India rama a rawn zin chu Australia-India inlaichinna ṭha zawk siamna tur bul ṭanna pawimawh tak a ni, a ti. Albanese hi minister of resources Madeleine King chuan a rawn ṭawiawm a, ani bakah sumdawnna lama hotu mi 25 in an rawn zui bawk.

Nimin khan Ahmedabad aṭangin Mumbai a pan a, INS Vikrant-ah guest of honours lo pek a ni. Tlaiah Delhi lam pan lehin, Rashtrapati Bhavan-ah a lawmna hun buatsaih a ni a, vawiin hian Hyderabad House-ah PM Modi nen meeting an nei ang.

Anthony Albanese chuan India leh Australia chuan zirna lama thawhdunna ṭha zawk siam a, educational degree inpawmtawn sakna tur ‘Australia-India Education Qualification Recognition Mechanism’ pawh an tifel tawh tih a sawi. Hei hian ram pahniha education provider-te tan hun ṭha tak a siamsak thei dawn a, education institution-te thawhhona ṭha tur a siam dawn bawk a ni, a ti. Australia-a Indian zirlaite tan scholarship thar siam a ni dawn tih a puang bawk.

Albanese hian kumin September thlaa G20 summit hmang tura India ram rawn tlawh leh a tum a, a rawn kal thei a ni chuan kum khat chhunga India rama Australia PM vawi hnih rawn zin hmasa ber a ni ang.