National party-ten a petu hriat loh aṭangin kum 2004-2021 inkarah Rs vbc 15,077 an dawng

Poll rights body Association for Democratic Reforms (ADR)-in a tarlan danin, kum 2004-05 leh 2020-21 inkarah national party-te chuan a petu hriat loh avangin donation, Rs vbc 15,077.97 zet an dawng tih a tarlang.

Kum 2020-21 chhung bika national party leh regional party-ten a petu hriat loh aṭanga sum an dawn chu Rs vbc 690.67 a tling bawk.

ADR hian national party pariat leh regional party 27-te sum lakluh dan a zirchiang a ni. National party pariatte chu - Bharatiya Janata Party (BJP), Indian National Congress (INC), All India Trinamool Congress (AITC), Communist Party of India (Marxist) (CPM), Nationalist Congress Party (NCP), Bahujan Samaj Party (BSP), Communist Party of India (CPI) leh National People's Party (NPEP) an ni. Regional party-te chu - AAP, AGP, AIADMK, AIFB, AIMIM, AIUDF, BJD, CPI(ML)(L), DMDK, DMK, GFP, JDS, JDU, JMM, KC-M, MNS, NDPP, NPF, PMK, RLD, SAD, SDF, Shivsena, SKM, TDP, TRS leh YSR-Congress-te an ni.

ADR hian political party-te Income Tax Returns (ITR) leh Election Commission of India (ECI)-a donation an dawn dan an thehlutte a zirchianna aṭangin report hi a siam a ni.

Kum 2020-21 chhungin national party-ten a petu hriat loh aṭanga sum an dawn tlingkhawm chu Rs vbc 426.74 niin, regional party 27-ten Rs vbc 263.928 an dawng bawk. Hemi hun chhunga Congress party bikin a petu hriat loh aṭanga sum a dawn hi Rs vbc 178.782 niin, hei hi party hrang hrangten a petu hriat loh hnen aṭanga an sum hmuh belhkhawm aṭangin 41.89% a tling phak a, BJP-in Rs vbc 100.502 a dawng bawk.

Regional party zingah kum 2020-21 chhunga a petu hriat loh aṭanga sum dawng tam zualte chu - YSR-Congress in Rs vbc 96.250, DMK-in Rs vbc 80.02, BJD-in Rs vbc 67, MNS-in RS vbc 7.773 leh AAP-in Rs vbc 5.4 te an ni.