Punjab sorkarin silai licence 813 tihtawpsak

Punjab-a 'gun culture' titawp tura hma lain, chief minister Bhagwant Mann kaihhruai Aam Aadmi Party (AAP) sorkar chuan Inrinni liam ta khan silai licence 813 a tihtawpsak. A hmaa a lo titawp tawhte nen, AAP sorkar hian silai licence 2,000 chuang a tihtawpsak tawh a ni.

Inrinnia silai license tihtawpte hi - Ludhiana Rural aṭangin 87, Shaheed Bhagat Singh Nagar-ah 48, Gurdaspur-ah 10, Faridkot-ah 84, Pathankot-ah 199, Hoshiapur-ah 47, Kapurthala-ah 6, SAS Kasba-ah 236 leh Sangrur-ah 16 a ni. Hengte bakah hian Amitstar Commissionerate-ah licene 27, Jalandhar Commissionerate-ah 11 leh district dangah pawh eng emaw zat tihtawp a ni bawk.

State sorkar chuan silai kawl tur hian dante dik taka zawm a ni tur a ni tiin, vantlang hmun, sakhaw hmun, inneihna hmun leh Punjab state chhunga function dang buatsaihahte silai kenchhuah leh pholan hi khap a ni tih a sawi. Silai leh tharum thawhna lam fakna lam khap tlat a ni bawk a, state chhung hmun hrang hrangte an enfiah zel dawn tih AAP sorkar chuan a sawi bawk.

Punjab-ah hian silai licence pekchhuah hi 3,73,053 an awm a, mahse AAP sorkar chuan 'gun culture' titawp tur hian hma a la chhunzawm zel dawn tih a sawi.