Parliament Budget session thawh hnihna ṭan

Nimin khan Parliament budget session thawh hnihna hi neih ṭan a ni a, House pahnihah rorel inkhawm ṭan a nih veleh Congress hruaitu, Rahul Gandhi-a'n London-a thu a sawidan chungchang avangin member-te inaubuaiin, inkhawm tihtawp a ngaih phah. Defence minister leh Lok Sabha-a deputy leader, Rajnath Singh chuan Gandhi hian Indian democracy chungchang a sawidanah, India hming a tichhia a ni tiin thupha chawi turin a phut tih a sawi. Congress member-te chuan Rajnath Singh thusawi hi lo hnial lekin, member-te an aubuai avangin chawhnu dar 2 thleng inkhawm tihtawp a ni.

Rajya Sabha-ah pawh BJP leh eptu MP-te chu Rahul Gandhi thusawi chungchangah an inhnial a, house leader leh union minister Piyush Goyal chuan Gandhi chu House-ah thupha chawi turin a phut ve bawk. Congress president, leader of opposition Kharge chuan minister thusawi hi chhangin, Rajya Sabha member pawh ni lo House-a thupha chawi tura a phut chu thil demawm tak a ni a ti ve thung. Kharge chuan ram danga prime minister Narendra Modi thusawi dante a rawn sawichhuak ve bawk a, mahse rorellai member lamin an lo tibuai a ni. Hemi hnu hian chairman Jagdeep Dhankhar chuan rorel inkhawm hi a titawp zui ve bawk.

Rahul Gandhi hian UK a tlawh ṭuma thu a sawiah, Indian democracy innghahna chu rawng taka beih a ni mek a, institution hrang hrangte pawh dik lo taka hman leh beih an ni mek a ni tiin a sawi a ni.

Parliament budget session hi thla khat chhung chawlh a nih hnuah nimin khan a thawh hnihna hi chhunzawm a ni. Sorkar lam chuan Finance Bill pass chu a dah pawimawh hmasa ber a ni tih a sawi. Hetih lai hian Congress president Kharge chuan sorkar inrelbawlna ṭha siamna kawngah ṭangkai tak nih an tum thu sawiin, House-ah pawh ram chhunga issue buaipui mekte sawiho zel an phut tih a sawi.