Covid-19 kai nuai 12 chuang an dam tawh

India ramah Covid-19 kai ni khata hmuh chhuah thar tam ṭhin hle mah se dam pawh an tam tawh hle a, nimin thleng khan mi nuai 12 chuang an dam tawh.

Ministry of Health and Family Welfare-in nimina report a tihchhuahah chuan hri kai hmuh chhuah thar mi 52,050 an awm leh a, a zawnin ni nga chhung ni khatah sing nga chuang hmuh chhuah thar an awm tawh. Hei nen hian hri len ṭan tirh aṭang khan ram chhung hmun hrang hrangah hri kai 18,55,745 an awm tawh a ni. 

Hri kai hmuh chhuah thar hi nasa takin pung mah se enkawl dam pawh an tam tawh a, darkar 24 chhungin dama puan mi 44.306 awm lehin hri kai dam leh tawh mi 12,30,509 an awm tawha, mi 5,86,298-in hri an la kai mek. 

Dampui tawh rate hi 66.30% a ni a, mi 803 laiin an thihpui leh avangin Covid-19 vanga thi mi 38,938 an awm tawh bawk. Covid-19 case awmna State/ UT-ah chuan Mizoramah chiah thihpui an la awm lo a, Lakshadweep chuan case an la nei lo a ni. 

Indian Council of Medical Research (ICMR) chuan nimin khan sample 6,61,892 an enfiah a, hei hi ni khata sample enfiah tam ber a ni leh. Hri len ṭantirh aṭanga nimin thleng khan sample 2,08,64,750 an enfiah tawh bawk.

January-ah kha chuan Covid-19 sample enfiahna laboratory hi rampumah pakhat chiah a awm a, tunah erawh 1,356 awm tawhin heng zinga 917 hi sorkar laboratory a nih laiin 439 chu private laboratory a ni thung.

India ram khawpui Delhi-ah chuan hri lengin ziaawm lam a pan nasa hle a, niminah khan hri kai hmuh chhuah thar mi 805 chiah (An dinhmun hmasa nena khaikhinin) an awm tawh. Delhi hi State/UT zinga hri kai tamna lama pahnihnaah a awm chho hman a, mahse tunah chuan panganaah an awm tawh a ni.

Hri kai tam ber State/UT chu Maharsahtra a la ni reng a, mi nuai 4.5 chuangin hri an kai tawh. Tamil Nadu-ah chuan hri kai nuai 2.6 chuang an awm tawh a, Andhra Pradesh-ah nuai 1.6 chuang an awm bawk. Karnatakah-ah chuan hri kai 1,39,571 an awm tawh laiin Delhi-ah erawh hri kai 1,38,482 an awm.