Kashmir Valley-ah curfew puang

Vawiin hi sorkar laipuiin Jammu and Kashmir tana special status pekna, Article 370 a tihtawp champha kum khatna a ni a, boruak ṭha lo a thlen palh venthawn thilah nimin leh vawiinah Kashmir Valley-ah curfew puan a ni. 

Prime minister Na­rendra Modi kaihhruai NDA sorkar chuan nikum August 5 khan J&K special status pekna, Article 370 a titawp a, hemi rual hian he article behchhana siam, Jammu & Kashmir-a cheng nghet (permanent resident)-te tana hamṭhatna pekna, Article 35A pawh tihtawp ve nghal a ni bawk. 

Article 35A hnuaiah hian permanent resident lote chuan J&K-ah hian ram leh in an lei leh an neih phalsak an ni lo. A hnu October 31 khan sorkar laipui chuan J&K state chu ṭhiatin, Union Territory pahnih - Jammu and Kashmir leh Ladakh-ah a ṭhen sak zui a ni. 

Article 370 tihtawp a nih hnuah NDA sorkar chuan J&K ah hian khuahkhirhna hrang hrang a hmang zui a, sorkar laipui thiltih dan dodaltu political party hruaitu 100 chuang chu pawn chhuak thei loa hren leh man an ni bawk. An mi hren zinga eng emaw zat hi chhuah ni tawh mah se, tun thlengin J&K chief minister hlui leh PDF president Mehboob Mufti chu Public Safety Act (PSA) hnuaiah hren zui a la ni.

General Officer Commanding 15 Corps B S Raju leh Director General J&K Police Dilbag Singh-te kaihhruaia security official, civil administration leh intelligence agency-ten Thawhṭannia meeting an neihah curfew puan hi an rel a ni. 

City police leh intelli­gence agency-te thu hriat ruk danin, August 5 hi India lak aṭanga inlakhran duhtu pawl leh, Pakistan thlawp pawl ṭhenkhatte chuan Black Day atana hman an tum a, tharum thawhna a thlen palh venthawn thilah, mipuite himna tur atan curfew hi ang puang lawk tih thuneitute chuan an sawi.