SC-in Bhopal gas pút tuarte chhawmdawlna pek belh tura ngenna hnawl

Supreme Court chuan kum 1984-a Bhopal gas pút nasa tak tuartute hnena chhawmdawlna pek belh phutna petition, sorkar laipuiin a thehluh chu nimin khan a hnawlsak.

Khawvela industry lama chhiatna thleng rapthlak ber zinga mi, Bhopal gas put vang hian mi 3,000 chuang an thi a, mi dang tam takin taksa leh hriselna lamah harsatna an tawh phah bawk.

Sorkar laipui chuan court hnenah hian gas pút tuarte hnenah chhawmdawlna, Rs vbc 7,944 pek belh an nih theihna atan Union Carbide Corporation (UCC), tuna Dow Chemicals-in a neih tak, case chu hawn thar leh a dil a ni. Petition a thehluhah hian, kum 1989-a chhiatna thleng chungchang court-in thutlukna a siam lai khan, he gas pútin mihringte tan leh, environment tana chhiatna a thlen nasat dan tak chu chhut chian a ni lo niin a sawi. Kum 1989 khan court-in a rél angin, Union Carbide hian chhiatna tawktute tan hian zangnadawmna, Rs vbc 715 a pe a ni.

Mahse court chuan sorkar laipui petition thehluh hi hnawlin, kum 20 hnuah a rawn tharthawhnaah hian sorkar laipui chuan ṭanchhan mumal tak a la pe lo tih a sawi. A hmaa Union Carbide-in zangnadawmna atana sum a pek pawh sorkar laipui chuan a tuartute chhawmdawlna turin a tawk a lo ti tawh a, tun thlengin RS vbc 50 chu khawih lohin a la awm bawk a ni, a ti. Reserve Bank of India-a Rs vbc 50 la awm chu chhawmdawlna pek tur tihkhawtlai sak mekte tana hmang turin a ti bawk.

Kum 1984, December 2 khan Bhopal-a Union Carbide factory aṭangin methyl isocyanate gas a put a, mi 3,000 chuangin an thih phah a, mi nuai tel a nghawng zui bawk. He thil thlenga mawhphurtu bera puh, hetih hunlaia Union Carbide chairman Warren Anderson chu a bibo zui a, a lakah hian non-bailable warrant pahnih tihchhuah a ni. Kum 2014 khan a thi a ni. Bhopal court chuan kum 2010 khan Union Carbide India Limited-a executive pasarihte chu kum hnih ṭheuh jail tang turin a hrem.