AAP-in an hruaitu 2-te man duh lohna lantirin signature campaign nei

Delhi-a rorellai, Aam Aadmi Party (AAP) chuan an party hruaitu pahnih, deputy chief minister hlui Manish Sisodia leh minister hlui Satyendra Jain-te chu thudik tawk lo hmanga thubuai siamsaka man an ni tiin, Thawhṭanni aṭang khan lungawi lohna lantir nan signature campaign an nei.

Party worker-te chuan in tinah kalin campaign hi an nei dawn a, signature an lakkhawmte chu prime minister Narendra Modi hnenah thawn an tum.

AAP Delhi convenor Gopal Rai chuan Laxmi Nagar Metro station-ah signature campaign hi a hawng a, 'Central agency - Central Bureau of Investigation (CBI) leh Enforcement Directorate (ED)-te chu sorkar laipui chuan hmang sualin, eptu hruaitute beihna hmanrua atan a hmang a ni," a ti. "Eirukna vanga man nia an sawi chu an chhuanlam ve mai a ni. An tum ber chu Delhi sorkarin chak taka hna a thawh chu tihtawpsak a ni," tiin Signature campaign an buatsaih chhan ber pawh central agency-te dik lo taka hman an nih dante mipuiten thu chiang zawk an hriatna atan a ni tih a sawi.

Delhi deputy chief minister hlui Manish Sisodia hi Delhi excise policy 2021-22 kaihhnawihah CBI hian February 26 khan an man a ni. Nikum May thla khan Satyendar Jain hi a sum hmuhna dik tawk lo leh thupah puhin ED chuan an lo man tawh bawk.

AAP chuan Delhi-a ward 250 huam chhunga in hrang hranga signature la tura an kal kual bakah, Lakskmi Nagar Metro station bulah booth an siam dawn tih an sawi bawk. Signature campaign hi March 30 thleng neih an tum a ni.