Trinamool Congress MP-in Rahul Gandhi thlavang a hauh; 'Congress hruaitu thusawi avang hian ngaihdam dilna tur a awm lo' -Shashi Tharoor

Congress party hruaitu, Rahul Gandhi-a'n UK-a thu a sawinaa 'Indian democracy' chungchang a sawi dan chu BJP chuan an helh chhunzawm zel a, na taka bei letin Parliament in hnihah pawh thupha chawi turin a phut hial.

Hetih lai hian rin loh lam aṭangin Rahul Gandhi hian thlawptu a nei. Trinamool Congress (TMC) veteran, MP Sougata Ray chuan Gandhi thlavang hauhin, "Rahul Gandhi hian a thusawi avanga thupha a chawi a ṭulna ka hre lo. A thusawiah ram pawi sawi zawngin engmah a sawi lo a, BJP zawk hi an dik lo a ni," a ti. TMC hi Thawhṭannia eptu party-te meeting neihah an tel lo a, Parliament-ah joint protest an neihah pawh an tel lo thung. Mahse Ray chuan a mimalin Gandhi thlavang hi a rawn hauh a ni.

Rahul Gandhi hian tun hnaia London-a thu a sawiah, Indian democracy innghahna chu rawng taka beih a ni mek a, institution hrang hrangte pawh dik lo taka hman leh beih an ni mek a ni tiin a sawi a ni. Thawhṭannia Parliament in hnih inkhawmah union minister eng emaw zat chuan Congress MP hi ramdangah India hming tichhiaah puhin, a thusawi avangin ngaihdam dil turin an phut a, eptu member-te nen inaubuai zuiin rorel inkhawm pawh tihtawp a lo ngaih phah tawh bawk.

Congress MP Shashi Tharoor pawhin Rahul Gandhi a thlawpna thu sawiin, a thusawi avang hian ngaihdam dil phahna tur engmah a awm lo, a ti. Parliament complex-a media mite a kawmnaah, Tharoor chuan, "Rahul Gandhi hi tunge a mawhpuh engmah a sawilang lo. Hetih laia hetianga lo tih hi politics awmze nei loa kalpuina a ni. Buainate chu ramchhungah ngei kan chingfel ang tih pawh a sawi a, heng avanga ngaihdam a dil a ngaihna chhan a awm lo," a ti.