Eptu party 18 hruaitu kawngzawh tumte Delhi Police-te'n an dang

Eptu party 18 hruaitute chuan nimin khan Adandi-Hinderburg issue chhui chian phutin Parliament aṭangin Enforcement Directorate (ID) office pana kawngzawh an tum a, mahse Parliament bulah Delhi police-te chuan an lo dang nghal a ni.

Kawngzawh ṭan hmain Delhi police-te hian eptute lo danna tur hian Vijay Chowk-ah daidanna an siam a, punkhawm khapna CrPc Section 144 an puang bawk. Police-ten an dan beh avangin eptu hruaitute an kal lui thei lo a, Parliament lamah kir lehin ED-ah appointment a hrana siam an tum tih an sawi.

Congress party president Mallikarjun Kharge chuan, "Kawngzawh tumte hi mi 200 vel kan ni a, hetihlai hian min lo dang tur hian police 2,000 vel zet an lo duty a ni. Aw chhuah thei loa min hrekbeh an tum a, hetih lai hian democracy chungchang erawh an aupui reng thung si," tiin BJP a bei zui nghal bawk.

US short seller Hindenburg Research report-in Adani Group chu sumdawnna a kalpui danah thil tih dik tawk lo a nei niin a sawi. Report-ah hian Adani Group chu stock tihchingpen, tax hman dan dik tawk lo, dan dik loa sum transfer bakah leiba tam tak an neih dante a tarlang a, report tihchhuah hnu hian Adani Group share hi a tlakhniam phah nasa hle. Ni 10 chhung lekin USD tld 100 hu zet an hloh hman a ni. Hemi chungchang hi eptute chuan vawi tam tak sawichhuakin, Adani Group buaina hian ramchhung mipuite a ngawng tel avangin chhui chian phutin nawrhte pawh an lo huaihawt tawh bawk.

Hetih lai hian Adani Group chuan an puhna hi thu diklo leh phuahchawp, India beihna chi khat a ni tiin an ṭang ve thung.

Eptuten an nawrna avangin Supreme Court chuan Hindenburg report zirchiang tur hian member paruk awmna expert committee a lo din tawh a . Eptute chuan Supreme Court-in committee a din chu lawmawm an tih rualin, Adani Group hi joint parliamentary committee (JPC) chhui chian tir an phut tel bawk.

Parliament budget session thawh hnihna neih mekah, eptuten Adani chungchang chhui chian an phutna leh, BJP lamin London-a Congress hruaitu Rahul Gandhi thusawi dan avanga ngaihdam dil tura an phutna thu an aupui ṭhin avangin rorel mumal thei loin an la awm. Thawhṭanni aṭang khan budget session thawh hnihna hi ṭan a ni a, mahse nimin thleng khan member-te inaubuai avang hian ro an la rel thei lo a, nimin khan a ni thumna atan Parliament in hnih inkhawm pawh tihtawp a ngai leh a ni.