Civil society group-te'n MGNREGA chungchangah eptu party puihna ngen

Ram chhunga civil society group leh labour organisation hrang hrangte chuan Mahatma Gandhi National Rural Employment Guarantee Scheme (MGNREGA) budget tipung tura an ngenna chu thlawp a, pui turin eptu party-te an ngen.

Civil society member-ten New Delhi-a eptu MP-te briefing an neihpuinaah, kum 2021 December thla aṭanga MGNREGA hnuaia inhlawhfa, tun thlenga an hlawh la pek lohte chungchang chu Parliament session-ah sawichhuah sak turin an ngen a ni.

MGNREGA tana sum dah chu a tam tawk lo a, attendance system thlak leh payment method thlak a nih dan te, hei hian hnathawkte tana harsatna a siam dante sawiin, briefing an neihna chhan chu MP-te'n he scheme hnuaia hnathawk, inhlawhfa dikna chanvo an humhalh sak theihna tur a ni tih an sawi bawk. Hnathawktu, hun rei tak an hlawh pek loh tihkhawtlai sak chu dan kalh leh pawikhawihna a ni tel a ni, an ti. Kumin hian MGNREGA fund-ah Rs vbc 60,000 dah niin, hei hi he programme kalpui a nih ṭan aṭanga fund dah tlem ber ṭum a nih thu an sawi.

An inkawmnaah hian Sanjay Singh (Aam Aadmi Party), Digvijaya Singh, Uttam Kumar Reddy and Kumar Ketkar (Congress Party), S. Senthilkumar (Dravida Munnetra Kazhagam), Jawhar Sircar (All India Trinamool Congress Party) leh eptu party MP dang ṭhenkhat an tel.