CBI Court-in Lalu Yadav leh a chhungte bail dilna phalsak

Central Bureau of Investigation (CBI) court chuan corruption case chungchanga Bihar chief minister hlui Lalu Prasad Yadav, a nupui Rabri Devi leh an fanu Misa Bharti-te bail dilna chu nimin khan a phalsak.

Lalu Yadav-a union railway minister a nih laia land-for-jobs case kaihhnawiha amah leh a chhungte hi thubuai siamsak an ni a, tun hnaiah CBI chuan an chenna inte dapin thu an zawtfiah a ni. Nikum July thla khan Lalu Yadav-a railway minister a nih laia a thawhpui hnai tak, Bhola Yadav chu man a lo ni tawh bawk.

Nimina court-in an bail dilna a ngaihtuahnaah Lalu-te nupa leh an fanu hi an inlan. Lalu Yadav hi thla thum liam ta khan Singapore-ah a kal (kidney) thlak a ni a, a taksa pawh a la chak ṭha lo hle a, court-ah pawh hian wheelchair nen a inlan.