Central bureau of investigation (CBI) chuan Delhi excise policy 2021-22 case kaihhnawiha Tihar jail-a tang mek, Aam Aadmi Party (AAP) hruaitu Manish Sisodia chu Feedback Unit (FBU) chungchangah eiruk thubuai a siam sak leh. 
FBU hi kum 2015-a AAP-in Delhi-a sorkar an siam hnuah an din a ni. 
CBI chuan, " Dan dik tawk loa Feedback Unit din leh hnathawh avang hian sorkar chuan Rs nuai 36 vel a hloh phah a ni," a ti. 
Delhi chief minister, AAP hotu Arvind Kejriwal chuan jail-a tang mek Sisodia laka thubuai siam belh an ni leh chu na taka sawiselin, he thil thleng hi India ram tan pawh lungchhiatthlak tak a ni, a ti. Prime minister Narendra Modi pawh bei zuiin, PM thil tum chu Manish Sisodia laka dik lo taka thubuai siambelh sak zel a, hun rei tak jail-a tantir a ni, tiin a sawi. 
Kumin February thla khan union ministry of home affairs (MHA) chuan FBU chungchangah Sisodia hi Prevention of Corruption Act hnuaiah chhui chian a lo phalsak tawh a ni. CBI report chuan Sisodia hian FBU hi politics khelhna hmanruaah a hmang niin a tarlang. Sisodia bakah FBU kaihhnawihah hian Delhi sorkara Vigilance secretary Sureh Kumar Jain, CM Kejriwal-a special advisor leh CISF DIG hlui Rakesh Kumar-te pawh thubuai an siamsak. Anni bakah FBU deputy director Pradeep Kumar Punj, CISF assistant commandant hlui leh FBU officer Satish Khetrapal leh CM advisor Gopal Mohan-te pawh thubuai siamsak an ni bawk. 
CBI hian Delhi excise policy 2021-22 siam leh kalpui a nih danah thil dik tawk lo awm nia sawi chungchang chu February 26 khan Delhi deputy chief minister hlui Manish Sisodia hi manin, Tihar jail-ah tantir a ni.