Min phalsak chuan Parliament-ah ka chhang ang : Rahul Gandhi

Congress party hruaitu, Rahul Gandhi chuan London-a thu a sawinaah India ram sawichhe zawnga thu sawia BJP-in an puhna chu, Parliament-ah thusawi phalsak a nih chuan a chhang ang tih a sawi.

NTDV-in an kawmnaah Rahul Gandhi chuan India sawichhe zawnga thu a sawi loh thu a sawi bawk.

London-a thu a sawinaah Gandhi hian India ram democracy dinhmun chu a ṭha tawh lo a, Indian democracy innghahna chu rawng taka beih a ni mek a, institution hrang hrangte pawh dik lo taka hman leh beih an ni mek a ni tiin a sawi. Hei hi BJP lam chuan na takin an bei zui a, India ram sawichhiaah puhin ngaihdam dil turin an phut a ni.

Hetih lai hian Congress lam pawhin an hruaitu thlavang hi na taka hauhin, ngaihdam a dilna chhan tur a awm lo tih an sawi. Prime minister Narendra Modi ngei pawhin ram danga a zin chhuahnaah Congress party chu na taka sawiselin a bei fo tih an sawi.

Congress president Mallikarjun Kharge chuan, " PM Modi hian ram dang a zinaa a thusawiah, kan ram chungchang ngei pawh ṭha lo taka sawiin India rama piang chu sual ti ang hialin a sawi. A thusawi thlawptute ngei khan tunah miin thu sawi tura zalenna a neih chu hrekbeh sak an tum leh si a ni," a ti.

Congress leh eptu party dangte chuan Adani-Hindenburg buaina chungchang sorkar laipui an nawr mek lakah mipuite rilru lakpen tumin BJP chuan Rahul Gandhi thusawi hi an rawn buaipui niin an puh. Eptute hian Hindenburg report-in Adani Group sumdawnna kalpui dana thil dik tawk lo awm nia sawi chungchang chu Joint Parliament Committee(JPC) chhuitir an phut a ni. Eptute nawrna avangin Supreme Court chuan Adani Group chungchang chhui tur hian member paruk awmna, expert committee a lo din tawh bawk. Hetih lai hian Adani Group chuan Hindenburg report-in a puhna hrang hrangte chu thu dik lo niin a pha thung.