J&K all party palaite'n ECI an hmu

National Conference (NC) hruaitu Farooq Abdullah kaihhruai, Jammu and Kashmir-a all party palaite chuan nimin khan Election Commission of India (ECI) hmuin, J&K-a inthlan buatsaih an duh thu an thlen.

Jammu and Kashmir-ah hian kum nga chhung elected government a ding tawh lo a ni. Assembly inthlan an neih hnuhnun ber chu kum 2014-ah a ni.

ECI nena meeting an neih hmain J&K all party palaite hian eptu pawl hruaitute an hmu a, J&K statehoood pek a nih leh theihna tur leh, an bial mipuite harsatna hrang hrang tawhte chinfelna tura an hmalaknaah nawrpui turin an ngen.

Kum 2019, August thla khan central-a BJP kaihhruai National Democratic Alliance (NDA) sorkar chuan J&K tana special status pekna, Article 370 titawpin, state a nihna ṭhiatin Union Territory pahnih, Jammu and Kashmir leh Ladakh-ah a ṭhen a ni.

BJP-in kum 2018-a People's Democratic Party (PDP) kaihhruai ṭangrual sorkar an thlawpna an hnuhdawh hnuah mipui thlan sorkar a la ding leh lo a, President's Rule hnuaiah an la awm chhunzawm reng a ni.